四川菜大平伙 (Closed)

✨今日，朋程仔就帶咗小妹去中環食呢間四川菜大平伙，入到去，小妹就覺得好似去咗一個藝術世界咁，眼睛望到嘅係幾幅畫作，木製嘅枱櫈，耳仔聽到 ‘是誰 在敲打我窗’ 蔡琴嘅歌聲，成個環境氣氛都好幾十年舊香港特色。✨餐單✨先黎涼碟，係麻辣蓮藕，本身小妹同朋友仔都唔會食蓮藕，估唔到幾得意，啲蓮藕涼中帶點辣，辣中帶點爽，幾滿足味蕾。✨之後係雞茸粟米羹，濃度啱啱好，唔太稀又唔太稠，取其中庸之道，唔錯唔錯，係唔記得問店員拎胡椒粉，否則味道更豐富。✨主菜有兩碟，第一碟係宮保雞丁，啲雞柳幾滑，好滑，味道亦幾好。✨而第二碟回鍋肉幾有驚喜，平時啲肉有層脂肪，食多幾舊都會濟，但係呢碟回鍋肉，個味道幾啱小妹，加上唔知點解雖然舊肉都有脂肪，但係食落去係爽嘅，無油膩嘅感覺，愈食愈開胃。