Burger's Friend Forever (MONTEREY Place) (Closed)

作為將軍澳居民，諗食乜都諗爆頭。唔想餐餐食連鎖，搵間小店？想高質又貨真價實？行出海濱，都有幾個好選擇。今日就去咗食burger!! Monterey 愈來愈多小店，係donki個商場沿地下左手邊直行，經過一排舖仔，就見到burger’s friend forever。店面唔算大，大概得5,6張4人枱。Burger選擇有14款，包括牛雞豬魚，種類算多。另外，生酮朋友有福，有生酮包 蛋糕同曲奇揀。如果唔想食burger，仲有意粉 小食選擇。#至尊漢堡貪心鬼揀咗個最大嘅，同朋友一半share。兩層牛肉，兩層芝士，再加煙肉同蛋，底下有菜同蕃茄，上菜時震撼咗我。超大個超厚！擘大口肯定一啖都食唔晒！牛肉好juicy，唔會柴枝咁乾，加上烤洋蔥汁，一邊咬一邊漏汁，煙肉同蛋幫佢加咗另一個層次，漢堡包包皮有焗香，少少脆口。另外仲加咗一份小食，叫做炸魚手指。初初以為一定係普通嘅鱈魚手指，點知原來用魚柳做，揸得好香脆，而且冇雪藏味，我相信佢哋嘅魚柳包都應該會好好食。餐飲升級左做蜜糖香蕉雲呢拿奶昔雲呢拿味好重，而且好香滑，有少少香蕉蓉，加上蜜糖，成件事非常夾。邪惡到極點。