北角四眼妹美食屋 (Closed)

近日朋友們搵到間幾正嘅格仔餅雞蛋仔店，由於唔止一個朋友講過，今日又順路黎呢度，所以走過黎試試。就到果陣已經見到呢個招牌仔餐牌種類少，但變化好多。以前格仔餅都係小販檔有得買，只有原味，淨係可以揀糖，奶，油多定少，食得多會厭。呢幾年開始係小食店有賣，大家都攪攪新意思，整啲特別味，但通常係郁雞蛋仔啲味嘅，少見會連格仔餅都變埋（整法應該類似？），呢間仲勁，連搽嘅醬都改埋，相當有趣。經職員推介下揀咗抹茶味格仔餅跟開心果醬（$26），兩樣都係特別嘢，亦係我鐘意嘅嘢。袋都係有孔嘅，免得侷腍個餅，佢可以俾多個膠袋裝住免得爆醬。裏面果個格仔餅真係勁足料，所以職員係無講錯嘅。食落去真係食得出抹茶感，加上即叫即做，所以有少少脆。頭幾啖未好感受到開心果醬嘅味，但係食多兩啖，啲醬再多啲果陣就好明顯，而且仲有開心果粒，真係好均真。一邊食一邊留意下黎幫襯嘅客，應該做開街坊生意，通常叫佢個孖寶：咖哩魚蛋豬皮蘿蔔配豆漿（$27），當中豆漿係自己磨嘅，今次係黑豆，真係幾特別。職員話平時通常係黃豆，但黑豆營養價值高啲，佢地都試過紅豆，唔同日子黎會有唔同，真係幾有趣。講多兩講，又望到只係$7支，就買咗枝試下。係幾濃同埋多渣嘅