龍華軒咖啡室 (Closed)

龍華軒兩位老細古靈精怪。咖啡店充滿住奇形怪狀玻璃瓶，關公、海盜王，大頭公仔，卡板當MEUN、載上眼罩嘅怪獸面具⋯⋯原來兩位老闆鍾意香港夜遊，去地灘、夜冷舗、天光墟搜尋舊物擺設；不特止，龍華兩人亦玩開Graffiti，難怪咖啡店門口佈滿色彩斑斕嘅Graffiti，見到人都開心啲。經營咖啡店好講有冇Heart！龍仔華仔除咗悉心佈置咖啡店之外，對咖啡同埋食物都好講夠。不少人都試過佢哋出晒名嘅卡邦尼意粉，但我今次就試吓佢哋嘅泰式肉碎意粉。咖啡店有得食泰式菜已經少次有少，而且哩味泰式肉碎意粉係涼麵，再配有酸酸的青檸味，微辣，天氣咁鬼熱，胃口唔多好，食哩個就啱晒喇！加埋蜜桃梳打，今個下午，相當滿足啊！龍華軒就好似兩位老闆嘅藝術品咁，係生活中累積細節，再用佈置、廚藝呈現畀大家。坐耐啲你會發現，原來佢哋重會玩吓結他，露營遊山玩水、影吓菲林相！所以龍華軒唔係咖啡廳咁簡單！最後，龍華兩人係咖啡控，就問佢哋研究手沖咖啡心得，重可以買佢哋咖啡粉啊！