餃掂手工餃子雲吞專門店

聽講呢間餃子嘅店鋪好有名，一直都好想試，機會難得，來到銅鑼灣就試下。至尊松茸豬肉餃 & 狀元九鼎湯相信試過嘅話，一定唔會否認佢係鎮店之寶。餃子皮厚薄適中，望落已經覺得飽滿晶瑩。饀料肥瘦適中，豬肉混合左松茸係一齊，松茸嘅鮮香，令每粒餃子嘅味道提升左一個層次。若果想味道再有變化，會有兩款醬汁，亦可帶岀松茸同豬肉嘅鮮味。另外配有狀元九鼎湯，好香嘅粉葛味同淡淡魚香味，用左活鯪魚﹑活鰂魚﹑紅蘿蔔﹑排骨等材料，飲落好順喉，感覺油應該唔係落左好多，相當健康。唔怪得佢嘅定價稍微高少少，因為真係好好食！雲吞麵 麵食落好彈牙，唔易斷。雲吞雖然細細粒，但一共有成12粒。雲吞皮薄，啖啖肉，咬落其實幾爽，肉香味鮮，不過個清湯略嫌有點鹹。黃金原味皮蛋外表有點似啫喱般透明爽彈，皮蛋好香，蛋黃仲有少少流心。同平時食開唔同嘅係，佢香得來好似冇果種刺鼻嘅氣味。上湯松茸時蔬菜心食落好新鮮，不過加左松茸嘅上湯飲落有點鹹，可以不用太重手。自家製山楂雪梨水 用左山楂、甘草、麥芽、冰糖等多種材料一齊製作，山楂味其實幾出，帶點酸甜味，飲落都幾滋潤開胃。