花花世界. (Closed)

近日流感傳染得實在快，早上十點仲好精神，向電話約左老公一點半去旺角食lunch，十一點已經頭開始痛，病左但飯係總要食嘅，近一點溫溫燉燉去到朗豪坊八樓揾花花世界，原來係向隔離朗晴坊😅上到去以為自己到左天堂，光猛環境配合好多花，又靚又舒服，枱與枱之間好有空間感，唔怕我D菌咁容易傳染俾第二位，說蜜話都方便😚一坐低侍應就俾杯偏熱嘅水我，滋潤下我開始痛嘅喉嚨，好窩心❤️我揀左個set lunch，先嚟個西蘭花忌廉湯，倒入英式茶杯飲用，好切合環境黑醋鯖魚配香草飯，唔知係唔係感冒到開始無味覺，我食唔到飯有香草味，但激讚個飯夠熱，食落胃好舒服，鯖魚煎得香用半價轉左個餐飲，玫瑰鮮奶伯爵茶，飲得到玫瑰味又飲到伯爵茶味，不濃不淡，啱啱好。