白鬚旗艦店 (Moved) New Location

今日有人問我，點解成日介紹貴野，有冇平野選擇。其實我唔係成日食貴野，所以口袋有好多平野選擇，哈哈，即刻搵間嚟講吓。前幾日去西貢玩，玩之前當然要食午餐，喺我西貢長長嘅list入面選擇搵間適合一家大細連小朋友嘅地方，就佢啦。(其實我好想去食牛牛，不過唔適合小朋友，還是下次）呢度嘅白鬚牛骨湯飯真係好得，牛骨湯好掂，完全唔會好油，充滿印尼嘅香料味，送飯真係一流，記住要快d叫，當日點幾就無貨。烤豬頸肉湯河同牛丸湯河都係有少少椰奶香係底，牛丸當然夠正，好raw個種肉味，同潮汕嘅牛丸嘅踏實唔同，烤豬頸肉可以接受，但係同荃灣米線店嘅世一豬頸肉有少少距離。印尼雞湯粉以為好清？錯啦，唔知點解比起豬頸肉同牛丸，我覺得最濃味。Gado Gado當然係不能錯過，有辣同唔辣揀，喺西貢嘅晴天食呢個啊特別有感覺。前菜栗米餅，可以啦，唔叫無損失。最後推薦佢嘅朱古力咖啡雪糕，好襯當日嘅所有食物。總結，呢間不錯，可以一戰。有冇人仲有西貢推薦？雖然我有西貢長長食list，但唔介意再長㗎。