大叔拉麵

Open Now

Now Closed

上次聽講大叔拉麵搞Pochacco限定時已經想去試，點知成個月都冇得閒。終於等到一日中午要去D2Place，的起心肝去試一次可能係茘枝角最有名嘅拉麵。中午都幾多人，但我算早到，唔駛等位。店內好多公仔，係幾得意嘅。叫咗個特濃雞白慢煮雞肉麵，以拉麵店嚟講上菜算慢，唔知係咪咁影響咗個麵玉，一上枱已經偏腍，唔太掂。如果係以麵質嚟評斷拉麵好壞嘅朋友，應該唔駛嚟試。湯：醬油遮晒雞白味，雖則話「特濃」係客人揀，但師傅都應注意平衡度。湯底醬油有種酸味，我覺得同雞白味唔多夾，特色係唔係一定好？在下認為見人見智。蛋係一流，溏心度好，好入味，如果有得齋買蛋外賣，我會幫襯！雞肉一般，嚡，唔覺係慢煮。叉（腩）夠味，夠焦，夠厚，都算唔錯。配菜仲有笋，脆，但冇味，唔俾好過俾。大叔拉麵出名，好評多，我認為係因為茘枝角一段冇乜競爭，最近嘅對手可能去到興華街一帶。如果真係論拉麵，真係平均以下，但佢嘅價位係喺「平均線」，咁計就性價比低咯。為咗佢隻蛋，會搵多次非繁忙時間嚟試下冇咁濃嘅湯麵，睇下值唔值推介俾人。