魔膳廚房 (Closed)

收工後同好朋友搵個地方聚一聚，今晚就嚟到位於觀塘APM旁行, 行2分鐘就到嘅魔膳工房。餐廳環境非常寬敞，今日比較早到，人未算好多，靜靜地傾計就啱曬喇。晚餐有豐富自助沙律，女生最愛。跟餐有紅湯 & 白湯。紅湯味濃，但唔太酸，啱曬我口味。白湯帶香濃菇味，朋友就最鐘意。大蝦、青口、魷魚等海鮮，全部又新鮮又嫩口，大蝦經過烤焗，仲特別有風味， 意粉配上濃郁龍蝦汁，朋友同我都食到停唔到口。原隻豬手火候剛好，一刀切下十分容易切開，豬皮充滿骨膠原，當然要多吃，跟上黑椒汁 & 酸菜, 特別滋味。雖然豬手份量好大，仲附有薯角，但轉眼就被我地清盤。唔覺唔覺...兩個女仔清曬枱，朋友飽到要叫返杯伯爵茶解一解，我就試咗呢杯荔枝玫瑰梳打。今晚傾計連食飯，前後坐足二個小時，大滿足呀。