鳥棲日本料理 (Closed)

觀塘駱駝漆大廈又多嘢買又多好嘢食。今日就去咗三座5樓，依一間好受食客歡迎嘅鳥棲日本料理食晚飯。餐廳環境舒適，座位都好寬落。食物方面，選擇都十分之多元化，而且價錢相宜，難怪咁多捧場客啦。韓風牛舌：睇落碟仔細細，其實份量都幾多。牛舌配上獨特醬汁，作為前菜小食，非常之惹味。雙重芝士年糕：日式料理其中款鐘意嘅食物就係芝士年糕。依個雙重芝士年糕，面頭有燒到熔咗嘅芝士，年糕入面又包住另一款芝士、一咬就流出嚟。年糕燒到軟棉棉，加埋兩種芝士帶嚟嘅雙重味覺衝激，好好味。大蔥雞肉稻庭烏冬：大蔥味超香，配上雞肉好夾。鳥棲所揀選嘅稻庭烏冬都好好食。牛肉他他燒：鳥棲以火炙刺身奉客，證明咗佢哋對食材嘅信心。牛肉他他油脂分布好靚配埋蘿蔔蓉醋汁吃，鮮香甜美、入口油香而唔膩。藍桔富士山、綠薄荷富士山：兩杯富士山主題嘅飲品、賣相一絕。當然、兩杯特飲都唔只得賣相、味道亦相當出色。特飲配上雲呢拿雪糕球，分開食亦得，撈勻落杯特飲亦得。