哈豆

Open Now

Now Closed

今日喺觀塘放工同朋友去咗呢一間富利工業大廈嘅哈豆doctor beans食台灣嘢，餐廳入面地方好大，座位都幾闊落，牆身畫滿晒台灣唔同景點嘅壁畫，背景播住好多耳熟能詳嘅台灣歌。我哋嗌咗走心牛肉番茄湯麵套餐、麻油雞加飯菜套餐同散叫逢甲鹹酥雞。牛肉番茄湯麵份量都幾大，幾塊牛腱都煮到好冧好入味，仲有粒花枝丸、貢丸、滷蛋同一堆嘅紅蘿蔔，成碗牛肉麵都幾有台灣風味，跟餐加$38嗌咗鮮榨檸檬椰果多多凍，益力多入面有檸檬、椰果同奇亞籽，酸酸甜甜幾開胃。另外個麻油雞套餐真係幾推介大家試吓，麻油雞湯用鐵鍋上菜，可以保持住溫度令雞湯嘅雞油冇咁快凝固喺面層，飲咗第一啖覺得好驚喜，啖湯好濃郁，飲得出好足料，三大塊雞件嘅肉質嫩滑，湯渣有薑片、蜜棗同冬菇，套餐陪咗一大碟青菜同一碗滷肉飯，滷肉飯上面有好多肉鬆同醃青瓜，一個人食真係好飽，另外加錢嗌咗杯珍珠鮮奶茶，茶味濃而珍珠煙靭，冇去到台灣旅行都可以食到滿滿嘅台灣風味！📍觀塘駿業里6號富利工業大廈3樓A室位置就腳：🍊🍊🍊🍊🍊餐廳環境：🍊🍊🍊🍊食物味道：🍊🍊🍊🍊整體CP值：🍊🍊🍊🍊🍊