盛寅慢煮製麵 (Closed)

今次出開觀塘搵食，意外地比鯊仔搵到間經濟實惠得嚟，又係港日Crossover嘅麵店，即刻同大家試吓好唔好食先~🍜 一人專享套餐 $69套餐包括炸物拼盤、湯麵或拌麵同飲品。炸物拼盤包括雞皮餃子、蜂巢豆卜同炸雞。其中最有驚喜係蜂巢豆卜，蜂巢豆卜外形炸得好似蜂巢，食落係魚肉豆卜，外脆內軟。價錢實惠，其中一份主食叫咗蔥油雞拌麵，麵底係蒟蒻麵，配大地魚蝦米湯，蒟蒻麵口感爽口，味道偏淡，配上蔥油雞，雞肉肉質結實，沾滿蔥油，如果唔鍾意蔥油嘅人應該會覺得少油膩，但個人認為幾香、幾惹味。而另一份主食叫咗胡麻雞拌麵，麵底揀咗油蕎麥麵，同樣配大地魚蝦米湯，油麵麵質比較煙靭掛汁，而且沾上胡麻醬，配上新鮮雞胸肉，味道的確唔錯。