小明珠

餐廳位於觀塘聯安街街尾，如果唔係特登行上黎都見唔到呢到原來開左間上海菜館。餐廳由有超過30年酒店中菜經驗嘅名廚創立，去開觀塘買野，今晚就黎試下。餐牌價錢唔貴，食物種類好多，小菜、粉麵飯、上海點心、甜品，通通都有。招牌小籠包/4只 ($45)小籠包做到皮薄而且多汁，一咬落去有爆汁嘅效果，果然係招牌菜。紅油抄手($42)正宗紅油抄手，6粒都大大粒，豉油甜甜地，加上面頭嘅辣椒醬好香，食起上黎好惹味。雞絲粉皮 ($68) 爽口彈牙嘅粉皮加上嫩滑雞絲、爽脆青瓜絲撈埋濃厚花生醬，係炎熱嘅夏天食呢道冷盤，有一種透心涼嘅感覺。擔擔麵(排骨) ($68)擔擔麵湯底花生味非常湯郁，麵條好細滑，配上蔥粒同肉粒好香。上海排骨雖然係炸，但一啲油膩感都無，而且咬落啖啖肉，肉質鬆軟，好少鋪頭可以做到。雪菜肉絲炒年糕 ($78)雪菜肉絲炒年糕雖然用料簡單，但越簡單就越睇得出材料嘅質素同廚師功力。年糕係用上海水磨年糕，雪菜唔會死咸，肉絲大大條，用料完全唔馬虎。廚師控制火喉控制得好好，年糕抄到煙煙韌韌 ，味道適中，配埋豆瓣醬，令成碟菜更為出色。餐廳價錢貼地，食物水準高，抵食夾大件，鍾意食上海菜嘅朋友真係唔好錯過。