港澳義順牛奶公司 (Closed)

今日喺佐敦附近食完面之後打算食個甜品，見到難得義順沒有人，就入去點左個熱雙皮奶同冰花燉雞蛋食。點完嚟到我先發覺原來冇咗雙皮奶，得返普通嘅燉奶，冇咗雙皮奶最重要嘅雙皮，已經覺得唔妥，因為點嗰陣時冇講明話冇雙皮奶，求其嚟咗好普通燉奶搏大霧，我一向食開點會唔知雙皮奶係點，叫個人來，就解釋話雙皮奶冇貨，食住先啦，😠咁咪即係呃我囉！我費事掃興就就咁食，不過味道同雙皮奶真係唔同。買單嗰陣時佢都收咗我$36雙皮奶嘅價錢，問佢點解冇雙皮收咗雙皮奶價錢，點知收銀個阿姐話”我哋不嬲都係咁樣收個喎‘ 咁我話呢你咪即係呃錢囉，之後佢就冇答我啦，淨係講話’$68啦！‘成個態度即係話我係呃你呀咁又點呀。之前去過銅鑼灣鋪頭，試過一坐低就講到明今日雙皮奶賣晒，會唔會食其他，老老實實，明買明賣。今日呢一間義順擺明係呃你唔識分乜嘢係雙皮奶，我見到有好多遊客去食，應該有唔少遊客被呃-食咗唔係雙皮奶嘅雙皮奶，大家下次去呢間食嗰陣時記得要望清楚，唔好比人得過且過左。