麥當勞

Open Now

Now Closed

天口鬼咁熱，行一陣個人都濕晒，附近甜品舖人又多又迫，加上價錢下下都三四十，純粹想搵個地方涼一涼冷氣太唔抵了，咁求求其其去下老麥食個雪糕算啦，今日呢間舖唔多人喎，一入就有枱仲要係卡位，正呀，冷氣仲好涼添呀，食飽左又唔使再點餐，都係點決定左嘅雪糕算。橫掂黎到就試下新口味，阿華田新地同阿華田窩夫筒，加埋朱古力脆皮都係十蚊同十三蚊，抵到爛，有埋位坐又有冷氣仲想點。講下杯雪糕，朋友食嘅窩夫筒內裏雪糕超多，比老麥筒起碼多一個double，個筒又脆又香口，好味喎。自己杯新地都好大杯，雪糕有著淡淡阿華田味，唔太甜，上面有阿華田粉增加阿華田味，加埋朱古力脆脆超正，鍾意飲阿華田嘅一定覺得正，無失望亦無伏，抵食又好味。好耐無真心覺得老麥嘅野好食，佢平時啲餐貪平食得落唔難食咋，呢個雪糕值得讚一讚佢。