樂糖 (Closed)

呢間多咗好多食肆，呢排多數都係呢邊食午餐，平時經過呢間餐廳以為係糖水舖。今日睇到門口嘅Menu見到原來有小食，有主食，仲有甜品添，幾對腳就踏咗入去。餐廳細細間清清靜靜，牆身藍色為主，牆面貼上白色小鳥同雲嘅剪紙，天花上吊住一個個唔同顏色唔同大細嘅仿氣球， 營造天空及轉鬆氣氛。我哋每人叫咗一份主食，兩份甜品，食物雖然份量少，但食得出有誠意及用心。服務態度亦唔錯，雖然只有廚房及樓面兩名職員，不過好有禮貌及細心。黑松露軟殼蟹意粉，軟殼蟹炸得好脆，黑松露味都幾濃，好味。夏威夷薄餅，批底鬆軟，幾好。雜錦海鮮意粉配蒜蓉欖油，蝦仁，蟹柳，鮮魷各兩件，微微蒜茸味，唔錯。+$30水信玄餅配雲呢拿雪糕(玫瑰蜜桃味)，幾精緻，水信玄餅食到底嘅玫瑰蜜桃味較出，食得到雪糕嘅雲呢嗱，不過入口有啲啲冰碎感。+$30霧之花卷(玫瑰荔枝花卷)，蛋糕鬆軟，上面有玫瑰花乾，忌廉幾滑，入口陣陣玫瑰香味，雪糕一樣有啲啲冰碎感。飲品+$3可以轉大杯。檸檬蜂蜜好似食緊蜜蜂糖。