初味 (Moved) New Location

諗唔到食咩，誤打誤撞入左間望落環境幾好既餐廳。我地計過叫晚市套餐最抵，所以叫左兩個餐。套餐有五道菜，第一道有36個月西班牙依比利亞黑毛豬腿片，火箭菜，芝士同北海道刺身帶子薄片，三文魚籽。我本身唔好黑毛豬腿片，但呢個幾好咬，幾好食。帶子刺身新鮮甜美，唔錯。第二道菜係南瓜蟹肉濃湯，口感順滑帶點甜味，加埋蟹肉，成件事高級晒。第三道菜有法式焗田螺伴薯蓉同燴香辣安格斯牛丸，兩個都好食，冇野好挑剔。第四道菜有法式油鴨脾肉牛肝菌意大利飯配香煎鴨肝同燒西班牙依比利亞黑毛豬柳。前者鴨脾肉幾香口，鴨肝入口即溶。後者豬柳口感淋淋地，好咬。第五道係心太軟，分別配左士多啤梨同蜜糖脆脆雪糕，好食。最後仲有餐茶，要左檸茶。呢間餐廳出人意料高水準，擺盤好有心機，服務都唔錯，只係上菜比較慢。