小皇國甜品 (Closed)

本來想去五代同糖，太耐冇喺旺角食糖水嘅關係連佢執咗都唔知，朋友就帶我嚟咗呢間黃店，睇menu 個個都好吸引，最後揀咗個益力多達人，嚟到個賣相都唔錯，面一層太多嘢，冇辦法落個益力多住，就食咗個雲尼拿雪糕先，伏到嘔⋯泥膠味，算！可能係我唔識欣賞，轉食菠蘿⋯超級酸！算！可能係罐頭菠蘿冇揀過，雪糕食到一半真係頂唔順，先諗起有練奶係到，淋上去之後，真係好食好多，全部變哂練奶味，練奶嘅作用原來係咁，食到咁上下終於到主角益力多刨冰，由於冇及時落，啲冰痴哂一齊，咁就照落等佢溶溶地先再食啦，食咗啖真係想講粗口，益力多並唔係大家市面上個種益力多，滿懷期待嘅益力多只係活乳酸菌味，其實算唔算係違反商業說明條例呢！？最後未食哂已經走咗。