泰妹餐廳 (The Wave) (Closed)

好快又要 收緊限制令， 食肆6pm 后冇得堂食， ot之後想食埋飯先返屋企都唔使旨意。 今天在觀塘放工， 去咗wave 工廈食泰國菜。餐廳鋪位分兩邊， 裝修光猛潔淨， 炎炎夏日亦冷氣充足👍👍晚飯有二至四人套餐， 一人晚餐也有數款選擇。冬陰功海鮮金邊粉晚餐與餐牌圖片一樣， 分量好大， 有青口，魷魚， 蟹柳 ，蝦仁等等。 湯底算比較溫和， 辣度和酸度可以提升多一點， 整體味道唔錯。晚餐小食： 香茅雞翼（4隻）， 香茅嘅味道唔算好突出， 不過雞翼非常嫩滑有肉汁， 唔会燒到好乾。另一款跟餐小食： 串燒雞肉（兩串）， 燒得啱啱好雞肉唔會嚡， 再沾上甜甜地嘅沙嗲醬汁～ 美味小吃。海南雞飯晚餐海南雞肉質算嫩滑，可能畀咗雞髀嘅部位， 雞味则不過不失， 蘸上秘製嘅海南雞醬汁，美味即時提升。油饭味道甘香可囗～泰式豬髀飯晚餐豬髀醃得好入味， 豬皮煙煙韌韌， 一定要配白飯！番石榴沙冰淺粉紅色 很有夏日色彩， 番石榴味唔算濃郁， 可以的話減甜一點。泰式凍檸茶， 茶味甘香， 添上青檸，絕對有別於港式嘅檸茶味道。外賣有折， 趕唔切返屋企食，泰式嘅外賣係唔錯嘅選擇～