梨滿園韓國料理 (Closed)

平日返工放工經過樂富呢個屋邨商場，好少放慢腳步留意鋪位格局，只係留意到M記早排由街鋪搬左入商場樓上鋪之後，經過商場時隱約聞到M記薯條味。最近發現商場M記附近開左梨滿園分店，之後諗番自己都好似好耐冇同屋企人同女友食韓燒，於是決定相約去食晚飯。我們一行四人，第一時間先睇四人餐有咩食。$428就有韓國前菜、一大碟烤肉、4個小菜再跟飯同例湯，盤算一輪後覺得幾抵食，所以一於試下。熟口熟面的6小碟 ─ 南瓜、大豆芽菜、白菜仔、泡菜、薯絲、雜菇。淨係望住眼前呢碟烤肉都知好夠食。雞件同牛肉都醃得好入味。店員仲提我地可以用生菜夾住烤肉食呢。「節瓜煎餅」沾了蛋漿煎成金黃色，味道不變情況下，賣相已加分。平日雖然少食魚(因為總覺得挑魚骨係件麻煩事)，但「鹽燒鯖魚」可謂百吃不厭。魚身好在唔會太乾太鹹，加點檸汁食，味道剛剛好，好啱搭配烤肉食。飯後仲有橙食，簡簡單單又一餐。