上品火鍋料理 (Closed)

今晚食打邊爐喇，同媽咪慶生梗係要圍埋1枱啦，今次又發現到超正湯底打邊爐喇，之前食過幾次手工火鍋聚，佢地既魚湯湯底一樣咁正，未淥野已經飲左2碗湯喇，呢次椰子花甲膏蟹湯底 198蚊 超大鍋，有大量秀珍菇粟米，落埋海鮮好甜，加20蚊仲可以加原湯，唔會落清湯溝淡哂，正。頭盤金磚豆腐$58夠哂鬆脆，特點是平時會切到細細粒，呢度就大大條，可以食到豆腐香滑質感。新張刺身併盤做半價 $220 就食到，有象拔蚌，三文魚，泰式生蝦，大甜蝦，北寄貝，鮑魚，帶子。最正係象拔蚌，鮮甜爽脆，推介! 安哥左個特價例牌都係$194，滿足。火鍋料推介肥美的9肚魚，即炸響鈴，同流心墨魚丸，彈牙墨魚入面有蛋黃流出黎，小心膽固醇爆升，牛肉併盤可以試足咁多款牛，家人鍾意多樣式，如果我會建議問問店員，選擇喜歡的口感再揀最想食既2款做雙併。食飽仲送甜品椰汁糕，仲有70蚊優惠券下次用。