魔膳廚房 (Closed)

見呢間餐廳唔係好顯眼，喺觀塘眾多嘅工廠大廈樓上，但見佢食評咁爆燈，呢晚就嚟試下.....店員好㚼心，除咗枱面已放咗嘅開水，坐低冇耐就問我要唔要熱水，仲要係用好靚嘅雲石pattern杯。有唔同嘅晚揀，每個都有餐湯同沙律，呢晚嘅餐湯就可揀忌廉粟米湯/雜菜湯，不過不失啦，反而個餐包好味啲，又熱又軟熟!本身跟餐係田園沙律，我吔就加$38試下自助沙律吧，簡單得嚟都唔錯，沙律菜、車厘茄、青紅黃椒，亦有已加沙律醬嘅鮮果沙律，又有西瓜同啫喱糖當生果同甜品。到主菜喇，先試呢度比較熱門嘅德國烤豬手配薯角，賣相唔錯之餘，豬手冇一般食到嘅咁油膩，再配埋沙律菜同酸青瓜，確實好味!另一款揀咗香煎三文魚柳配藜麥沙律，店員話實際上係慢煮三文魚，食落又真係唔會煎得太老，剛剛好，再加啲芒果汁，而最嘩然嘅係好夠份量嘅沙律，沙律菜同藜麥之餘，仲有啲士多啤梨、藍梅、桔仔肉。