2DP (Closed)

素食盛行，除左傳統既素食店，而家好多新式素食都開始流行。2DP就係走新派作風。適合素食，生酮人群。餐廳地方唔大，但擺左好多桌椅，坐得有D逼，叫多幾款菜式張台都擺唔落而且要自行斟水，有D唔方便。菜式行西餐廳風，意粉，飯，all day breakfast，pizza都有（詳細可以睇翻其他食評既圖）太多我懶影，哈哈哈哈。仲有每款都好似好吸引既甜品同特飲。當日我地order左個生酮all day breakfast（雖然我唔生酮飲食，但平時食下都無問題） 牛油果味ok，唔係最靚亦唔係平價款。天貝未必每個人都食得慣，我就嘛嘛地，不過佢整得比我平時整既好味既（天貝係發酵黃豆，屬於印尼既一種食物）菠菜唔知點解好似有稍微炒過，食落有D油咁奇亞籽乳酪平時我都食開，味道唔錯炒蛋唔夠滑，有D『鞋』不過整體搭配唔錯既。牛乾菌寬條麵（類似咁既名）醬汁creamy，好味。個人鍾意食厚身，寬既麵，貪佢有嚼口，咧款啱曬另外有一款好似係雞絲沙律，都唔錯。沙律足量，『雞絲』好味。甜品冰沙係煉奶味，密瓜本身唔係太甜，需要煉奶配合。甜度適中整體滿意，以上所有食物埋單5XX左右，如果坐得舒服D就更好。