笑麵虎車仔麵 (Closed)

返工見開左間新店食車仔麵，裝潢不錯個名又幾得意就去試下。出面等候有D亂，等外賣既又排緊隊，堂食既又一齊排。之後先發覺堂食直接入去就會有侍應帶位。坐則邊位D高凳，MENU係可擦的膠片，環保加分。麪、湯同汁可分開揀。加左$4試特別湯底，揀埋沙嗲汁。到揀野食，想試五花腩脆片，冇得賣；手製漢堡，剛剛賣曬；仲有好幾樣特別D既食送都冇……咁唯有揀其他普通既野食。上菜係快既，車仔麵嘛。點知上錯左….我要油麪佢上左粗麪…已經唔太開心，都唔使佢換啦，同佢講番，即係哦左一句… 我點左水餃同唐心蛋(因為有虎爪，即係推薦啦)，加埋生菜。份量少到呢…水餃好細粒，唔係見到有D木耳我以為係雲吞…菜都係少最唔掂係隻唐心蛋!!!!零‧唐‧心!!食到呢度忍唔住要影相。同食烚蛋係冇分別的！唔講以為食緊茶葉蛋，只係比茶葉蛋軟D都冇咁乾…最好係D湯底，可能加左沙嗲汁，係幾惹味既，不過其他(包括麪)就真係強差人意。跟住佢d「虎爪」揀都伏，而且價錢又偏貴，食樓下平D既車仔麫仲冇咁嬲，所以應該冇下次了。