詠藜園四川菜館 (Moved) New Location

之前去過裕民千歲，嗰邊走中上檔路線，而呢間位置相對吊腳，就走傳統川菜館風味，裝修古色古香。睇餐牌，印象中兩者價錢相若。先嚟碟「話梅涼瓜」。涼瓜浸咗咁耐話梅汁，確實冇餐牌張相仲可以咁翠綠，苦瓜啲白衣清得夠乾淨，所以冇苦只剩甘味，加上滲透哂話梅汁，好食程度係想返家依樣畫葫蘆煮番味。「改良擔擔麵」同冇改良個分別比較明顯係多咗肉鬆（本質係肉碎，不過佢口感模樣都夠鬆化），麵底俾湯底浸潤住依然爽滑。「紅油抄手」始終掂唔到我心目中抄手嘅汁底，唔夠蒜，欠點甜。「雲白肉」片身比較厚，同樣唔夠蒜，反而豬肉肉味夠濃又彌補番。餐牌無可否認選擇真係夠哂豐富，會有興趣日後試埋晚市。