慢煮屋 (Moved) New Location

餐廳位於創紀之城五期附近觀塘工業區入面嘅駱駝漆大廈3期，由觀塘地鐵站起計路程六至七分鐘，位置方便。但店鋪同我期望中嘅Instagram人氣餐廳有啲落差，入面比較簡約（陋），冇咩裝潢可言。位亦係得膠櫈，坐得唔係好舒服。我嗌左Instagram大熱嘅「慢煮牛腹扒蕎麥冷麵 」($88附送一隻溫泉蛋)。要讚嘅位係牛腹扒數量幾多，有成十幾件，對於一個女仔黎講真係夠有凸（雖然最後都食曬），牛腹扒亦係我中意嘅半熟狀態。可惜肉質唔算嫩，咬嘅時候冇咁上下牙力都唔得，食完塊面好似瘦左😂 蕎麥麵麵質普通，個汁略嫌淡，完全冇醬油味，要撈埋溫泉蛋個燒汁食先夠咸。我分左少少朋友嗌嘅「照燒慢煮鳥肉芝士爆丼 」($68附送味噌湯）黎食。份量同樣係幾大碗，但味道一般般。雞肉唔係特別嫩同入味，芝士亦冇咩味，成件事都好淡。整體而言，由於抱住好大期望黎食，我對今餐有少少失望，佢地嘅食物質素同環境有待改善。不過勝在價錢適中，份量大件夾抵食，我同朋友都食到飽。