餃里 (蕪湖居)

Open Now

Now Closed

今日帶阿仔踢完波，落車經過見到呢間全人手包既餃子店~餃里，就決定買外賣返屋企開餐。小店採用開放式廚房，可以見到每張單下面都有一個計時器，計算製作時間，煎餃須時10分鐘，湯餃就8分鐘，認真態度令我哋願意耐心等候。餃子有十幾款口味，湯餃或煎餃任君選擇，仲可以雙拼或叁拼，更有清新素菜系列，配合不同客人須要。我哋叫左叁拼湯餃，包括味道傳統既椰菜鮮肉，味道香濃既香荽鮮肉，及味道特別既紫菜鮮肉；另外每款湯餃都配上住家湯水，我揀既老火椰子豬骨雞湯，不添加味精，湯頭鮮甜不油膩，外賣仲可以分湯，唔會浸淋餃子，好細心。煎餃就叫左韭菜鮮肉和芝士粟米鮮肉，每一隻餃子既外皮都煎得金黃脆口，咬落去餡料鮮嫩多汁，韭菜煎得勁香；芝士味道濃郁，粟米粒爽口，更有少許拉絲效果。餃里撈麵唔辣，配上小店自家製醬汁和辣菜脯，令平凡既麵條生色不少。總結，餃子超多口味，用料新鮮，份量十足，餃子控不要錯過。