韓宮 (Closed)

已經有一段時間冇食過韓國嘢，特別掛住醬油蟹同燒肉，今次朋友就揀咗呢間餐廳，一次可以滿足晒我兩個願望。我同朋友揀咗個二人燒肉套餐，牛肉比較貴，所以我哋就揀咗豬肉（$399），有兩款唔同味道嘅五花腩同埋豬頸肉，再加埋必備嘅泡菜，非常豐富。我自己就比較鍾意辣味嘅烤五花腩，食落唔會太辣，腌料非常入味。之後就到我最期待嘅醬油蟹，食一如以往嘅鮮甜，撈飯食，簡直係一流。最後我哋仲叫多咗個人蔘雞湯暖吓胃，呢度嘅人蔘雞湯人蔘味道又唔算好濃，但勝在新鮮滾熱辣。