煲師傅砂鍋小菜

Open Now

Now Closed

見網上好多人都推介呢間雞煲放題，價錢唔貴仲要質素幾高，一直都好想嚟食，今日終於有機會！雞煲有兩款味可以揀，有三重芝士同埋麻辣奇味，我哋就揀咗麻辣奇味，雞煲份量好多，同平時出邊食開嘅雞煲唔同，件件雞肉都係雞髀肉，啖啖肉仲要超級嫩滑，麻辣只係微微辣，麻中帶香，唔太食得辣嘅都唔使擔心，本身仲諗住食多一個雞煲，因為真係好好食，但係個份量有啲多，所以我哋都係留返個肚食火鍋！火鍋有正宗麻辣、芫荽皮蛋、蕃茄薯仔湯底，我哋揀咗正宗麻辣湯底（中辣）。啱啱開頭食中辣都唔覺得好辣，但之後越食啲辣就越出，陣麻味都唔會冚咗辣嘅香味，係唔錯嘅湯底！配菜都有好多選擇，最正一定係特選美國肥牛同埋特選羊肉片，牛肉非常新鮮，鮮紅色嘅牛肉，入口嫩滑，配埋麻辣湯底一流！羊肉片都好新鮮，一啲都唔騷，忍唔住嗌咗幾碟！另外嘢飲都係任飲，有包裝檸檬茶、菊花茶、蘋果綠茶等等，仲有竹蔗茅根就算食麻辣都可以清熱。最正嘅一定係每人一杯Häagen-Dazs雪糕作為甜品。講真二百幾蚊，可以食到高質雞煲同埋火鍋放題仲有Häagen-Dazs雪糕，仲要質素唔錯，真係幾抵食，性價比超高！