SuperNormal (淘大商場2期)

Open Now

Now Closed

探完朋友同bb喺附近食埋晚飯，上網搵到呢間評價極好嘅餐廳，隱藏係淘大商場對出嘅角落，位置唔太顯眼，行近就見到轉角有大大個霓虹燈logo，非常容易辨認。手打鮮蠔湯鮮味濃郁，蠔味突出之餘仲有好香嘅菇茸作為餘韻，口感順滑，每一啖都係享受，好有驚喜！黑松露薯條幾乎係我哋每次食西餐必點，松露落得好大方，香味濃郁，混入少許芝士，極度邪惡。食厭咗牛肉漢堡，今晚特意點咗炸魚漢堡，魚柳大大件，即叫即炸，入口外脆內嫩，配上健康嘅牛油果、蕃茄、生菜同清新嘅他他醬汁，係完美嘅配搭！牛肝菌意大利飯水準亦好高，米粒熟而不爛，帶些少咬口，濃稠嘅醬汁帶嚟黏稠順滑嘅口感，混入露筍令成個risotto更加清新，減低膩滯感。香煎鵝肝兩面煎成金黃色，香氣四溢，入口係滿滿嘅邪惡滋味，令人齒頰留香。酷愛mojito嘅先生點咗一杯無酒精嘅薄荷青檸梳打，加入青瓜感覺格外清新。今晚點嘅每一道食物都令人非常滿意，特別係手打鮮蠔湯，令人印象特別深刻，餐廳食物水準極高，而且價錢合理，難怪一直好評如潮。