豐味蒸食

Open Now

Now Closed

廣東道街市出名平靚正，同男朋友嚟買餸之前想醫肚先，見到呢間小店主打石磨腸粉，二話不說即刻入咗去。由於樣樣都想試，我哋兩個人都叫咗幾多野，包括有鹹蛋肉餅飯，招牌豬脾腸粉，鮮蝦腸粉，豬脾同埋餃子。豬皮腸粉都幾少見，所以都幾期待，腸粉都係即叫即蒸，見到已經舔舔脷，嗰層皮的確好薄好滑，同一般嘅廣東腸粉唔同，入邊包左豬脾粒同埋蔥、生菜，有爽脆嘅層次感。至於鮮蝦腸粉，隻蝦都好彈牙好鮮甜，好好食。由於太想食豬髀嘅關係，另外都叫咗一隻例牌豬脾，超好食，軟熟得來啲肉質都好嫩滑，肥膏同肉嘅分布得宜，一啲豬蘇味都冇，有時買返屋企加送都係唔錯嘅選擇。男朋友驚唔夠食，叫多咗個鹹蛋肉餅飯，佢話鹹蛋肉餅冇乜驚喜，反而驚喜嘅係啲飯，因為佢比較鍾意硬身有趙口嘅飯，呢個煲仔飯就做到呢種效果。另外我哋都叫咗餃子雙拼，分別係韭菜餃同埋鮮蝦豬肉餃，餃子都好好食好足料。嘢飲方面值得一提嘅係呢度嘅豆漿可以揀無糖，食得健康啲。