藏 (Closed)

餐廳喺銅鑼灣，係高級日本料理餐廳。Lunch Set非常高質，包括沙律、茶碗蒸蛋、味噌汁同甜品。沙律菜好新鮮，鮮甜番茄，再落麻醬，最特別係上面有炸京蔥，味道似炸蒜但冇咁重味。味道更豐富又唔會影響沙律嘅清新感覺。茶碗蒸蛋上面鋪滿蟹肉絲，令到蒸蛋有淡淡蟹味。蒸蛋本身勁滑又充滿蛋香，比起平時食嗰啲更高層次。味噌湯就味道適中，最緊要係熱辣辣，飲完全身暖笠笠。【極み刺身7種$340】用一隻有花紋嘅透明玻璃碟裝住，好鬼靚。七款刺身每款有兩片，師傅有心思，有啲刺身加咗唔同嘅調味料，味道更多變化。甜蝦鮮甜帶膠質，配咗黑松露，味道又幾夾。鰤魚就魚味濃，配柚子醬酸酸甜甜，加添清香感。𩶘魚好滑身，配少少辣蘿蔔，刺激吓。火炙銀鱈魚刺身就第一次食，有少少焦香味。魚油豐富，正。最好嘅要留到最後。拖羅好厚切，粉嫩色魚肉滿佈脂肪，魚味油味濃郁，不得了。【日本雲丹アメリカ伊勢海老丼$480】一上枱，先係震撼，然後興奮。成隻龍蝦已拆肉，仲有一排海膽。海膽完全冇腥味，鮮甜十足。龍蝦肉雪白，爽口鮮美。下面嘅飯有蟹柳、菇片、甜蛋同紫菜。超滿足，坐喺旁邊嘅食客都係食緊呢個，真係「大人氣」。甜品係日本傳統嘅紅豆蕨餅，口感軟滑柔韌。