包包傾老趙越南餐廳 (Closed)

前晚師傅一條冷食晚飯, 諗下食咩好啦, 左諗右諗都唔知食咩好, 最後行到黎呢間食店門口見係食越南野, 師傅見好耐都冇食過就決定入去食碗越南河!入到去唔算好多人, 坐底睇下有咩食啦, 師傅本想簡簡單單叫碗生牛肉湯檬, 點知又比師傅見到三寶牛湯檬, 反正都未試過, 決定試一試!三寶牛湯檬係有生牛肉, 熟牛肉同埋牛筋, 先講下個湯底先, 湯底幾香幾濃幾甜, 而且好重蘿蔔味, 碗中間有一舊好大白蘿蔔, 白蘿蔔好甜好腍; 生牛肉不算嫩滑, 而且d湯太滾, 生牛肉到出黎已經變左熟牛肉; 而熟牛肉就熟上加熟啦, 所以係又老又韌又鞋; 牛筋好腍不過就冇咩味, 一般; 而檬粉份量都幾多, 不過芽菜就生左d, 麻麻地; 落少少辣醬就會好味少少!總括黎講呢碗越南湯檬唔算出色, 牛肉又老又鞋, 全碗最好味樣野係個蘿蔔, 都咪話唔攪笑! 三十蚊碗湯檬仲要冇加一都叫抵食, 下次都或者會黎試下其他野啦!