早安越南 (Closed)

今日放工都好晏，兩個人想食啲冇咁heavy 嘅嘢。食越南野又可以叫個粉，又可以叫啲小食。特選細拼盤，簡直係一碟滿足幾個願望，有春卷、粉包、香茅雞翼。春卷香口，粉包多餡，雞翼入味。呢個係牛肉凍檬，檬粉好彈牙，牛肉又入味，加埋啲酸汁真係開胃。呢個係海鮮沙嗲粉絲煲。原先以為係呢個煲嘅汁係滐嘅，但係嚟到就見到個汁係好似湯咁，同預期有啲唔同，仲等我哋叫咗蒜蓉包諗住點汁添。啲海鮮有海鮮味但係一啲沙嗲味都冇。個煲啲粉絲係黑粉絲，有啲似薯粉個樣，但係冇薯粉咁彈牙。最後蒜蓉包，有4件。個包反宜好好食，個包好軟熟，又有濃郁嘅蒜味，齋食都好好味。