越安喬

Open Now

Now Closed

落咗幾日雨，今日趁住天氣好又出元朗搵食，來到呢間越式小店，睇餐牌先知道原來係越南家庭來港經營，一於試下正宗越南風味美食。餐廳主菜可以優惠價追加小食，最後加咗一份紙米卷及柑吉雞翼。生牛肉湯河 :可以揀生或熟牛肉，先試試湯底，味道好鮮甜，餐廳標榜唔落味精，飲完都唔覺得口渴；牛肉份量都幾多，浸湯後半熟，食落好香牛肉味。柑吉雞翼 :雞翼外皮焗得香脆，肉質依然鮮嫩，柑吉醬甜中帶甘味，食落非常開胃。燒豬頸肉紙米卷 :紙米卷口感煙韌，餡料好豐富，除咗豬頸肉外，仲有生菜、甘筍絲及檬粉，沾埋魚露食更加好味。蛋咖啡 :第一次試蛋咖啡，係以蛋黃取代牛奶做成泡沫效果。上枱時鮮黃嘅蛋及咖啡層次分明，賣相好吸引。入口好濃蛋香味，蛋黃泡沫味道微甜，有d似蛋糕咁，配上咖啡感覺好特別。