金萊餐廳 (Closed)

星期六1130銅鑼灣搵間快食，見有新餐廳開唔洗排隊就試吓新嘢。一入去坐低已經發現佢唔多夠人手，但個阿姐好好禮貌又坐得唔密都幾好。1134叫左個常餐，之後見付近食客同阿姐的對話就發現又有人退食物又有人催單，已經有少少驚。大概10分鐘來杯凍檸茶，雖然都有啲慢但係味道正常嘅。其實我要食個快食因為1215就要走，本來諗住快餐九個字乜都夠啦，點知11:50仲未有嘢食咁我就問阿姐，佢話五分鐘到。1155仲未有，再催又話兩分鐘。最後12先到，即係等咗差唔多半個鐘先有嘢食。其實佢個飯幾好食賣相唔錯，不過我趕時間冇影相。快食完比錢，我見八達通唔夠錢我又只有$500紙未比$500找啦，點知咁大間餐廳$500都冇得找，咁唯有用到八達通負數啦。總結呢間餐廳食物唔錯阿姐態度幾好，但佢完全係未ready 就營業，未坐滿都做唔切，連散紙都未準備好。趕時間千祈唔好去，大把時間慢慢坐就啱你。