泰式食

Open Now

Now Closed

平時去到銅鑼灣，同朋友食開嘅都可能係日式或者韓式菜，但係講到泰國菜嘅我諗應該唔係好多啦。今日朋友帶我嚟金百利隔離成日好多人排隊好多人派傳單嘅呢一棟商業大廈，去試呢一間泰式食。一入去就見到好多泰國嘅裝飾，有tuktuk車! 而且聽店員嘅口吻，好多都好似識講泰文咁嘅。我哋一坐低見到有個套餐牌，見到上面嘅嘢都幾啱食而且價錢都唔貴喎三百幾蚊兩個人除翻開都係百零蚊又有兩個飯又有甜品，夠晒食啦！首先嚟嘅係馳名冬陰公湯，唔會好難，但係有冬陰公酸酸甜甜嘅感覺，好開胃，而且入邊都好足料，有矮瓜，椒，仲有啲雞肉添，而且雞肉唔會係好鞋嘅。之後就想泰式豬肉串燒，我自己好鍾意泰式串燒嗰啲沙嗲醬嘅，仲食咗一盒粒花生，又香口，正！之後就有青咖喱雞，同埋飛天炒通菜，每樣野都不過不失嘅，要讚嘅係其實每一樣野都好大碟，兩個女仔絕對夠食，仲有兩個大白飯添。而甜品方面就有芒果布甸啦，入邊嘅芒果唔會因為係甜品而俾得好少，一句講晒足料夾大件。仲要一讚嘅係員工好快手，如果見到你冇水嘅就會即刻斟俾你，見到你一舉手就會行過嚟問你需要啲咩，而家係食肆黎講都算好難得㗎啦。