食神麗宮

Open Now

Now Closed

又有朋友就黎移民，今次揀左食中菜，貪佢圓枱方便傾偈，又冇限時可以慢慢傾，聽講食神麗宮係由星爺套<<食神>>嘅飲食顧問坐鎮，所以專程過黎試下。茗茶$12/位，花生$12碟，比好多連鎖茶樓都平。特醬燒乳鴿($35) - 乳鴿原隻上，店家有提供較剪同手套俾食客自己分。乳鴿皮脆肉嫩，唔會太肥，少少鹹香幾好食。蒜香玉乳脆鱔球($168) - 脆鱔球一客有八件，外層炸皮酥脆，鱔球肉質扎實冇碎骨，食落唔會太油鹹鹹香香非常惹味。15年陳皮話梅骨($118) - 話梅骨賣相紅紅地有啲似南乳，但入口話梅酸甜味好突出，炆得夠腍，骨肉好易分離。戲棚龍蝦湯泡粥($68) - 升級版蠔仔粥，用龍蝦代替蠔仔，味道夠又唔會太鹹，另外仲備有油炸鬼可以加入去，泡粥都幾大碗，可以兩三個人share食。紫米露 - 埋單仲有糖水送，可以揀腐竹蛋糖水或者紫米露，紫米軟硬度適中，椰味香，食完個糖水滿足晒。總結，小菜選擇唔算太豐富，不過每道菜都好有水準，侍應都比連鎖茶樓親切熱情，會同食客吹水講笑，絕對令成餐飯加左唔少分。