不倒翁中日火鍋料理

Open Now

Now Closed

一個地球上祇得一個蘇絲黃，同樣地蘇絲黃喺電視介紹好正個碟肥牛亦入左佢老人家個肚，所以我地去不倒翁極其量祇係（希望）食到類似嘅質量同質素。不倒翁雖然位處佐敦道旺區，但係縮左上二樓，所以十點後亦要做特價招徠，小弟第一次去已經係十點特價時段，所以同正價時間無從比較是否將貨就價，招牌手切牛肉質素中上，不過叫大碟都係冇幾多，我同女朋友兩個人可以食兩碟大手切肥牛，份量之少可以想像得到，而且全部都碎濕濕咁，要一次淥幾塊先夠一啖，一碟大概十啖左右，鴛鴦湯底普通，西瓜汁冇味，招呼尚算不錯，間中有侍應幫你撇走湯上面嘅油同泡，不過亦犯上同其他火鍋店同一個毛病，但係猛推海鮮，雖然海鮮好利錢，但亦要顧下客人感受，適可而止。如果妳係蘇絲黃，我係食店經理，揀都揀碟靚靚仔仔嘅俾你啦，炒碟餸都叫師父炒啦，唔通叫尾鑊炒博鬧咩？加上佢呢期當紅，食店得罪佢肯定冇運行，我建議搵兩個老臨入餐廳點晒食物，到食物上檯先輪到蘇絲黃出場試食，我諗事情發展落去可能係兩個故事。