School Food (Closed)

尋晚約咗朋友們去銅鑼灣食晚飯，因為唔知食咩好，所以就去咗時代廣場上面嘅食通天搵嘢食。11樓間韓國菜好多人，於是我地上咗13樓，友人提議不如食school food。其實都幾多人，我地等位大約都等咗半個鐘入到餐廳入面環境ok，座位唔算闊落但係都未至於會比人行過撞到。我地叫咗沙冷希肉、烏卒卒壽司卷、水冷麵、卡邦尼年糕、梳乎厘焗蛋同一榨菠蘿特飲。沙冷希肉有d似上海嘢嘅肴肉，（大塊切片版本）都ok但係最好食係下面嘅沙律！菜夠甜，沙律醬汁較得好好！烏卒卒係魷魚壽司卷，壽司飯用墨魚汁處理過，都幾特別！梳乎里焗蛋熱辣辣，口感比甜品果隻梳乎厘好，有d似實心水蛋幾得意味道都ok！水冷麵同平時食開嘅有少少唔同，呢間係撈埋辣醬落兜麵到，雖然都好食但係我比較鍾意有得自己較味嘅水冷麵。卡邦尼年糕個汁非常濃味，亦偏向芝味重，年糕煮到剛剛好，好食不過好滯同埋唔似韓國嘢！菠蘿特飲味道都ok，個樣好靚但係飲唔出係菠蘿......食飽傾唔到一陣就要交枱，呢到限時75分鐘，如果食飯+吹水嘅朋友就要留意返喇。