Quattro's Kitchen (Closed)

干邑龍蝦湯龍蝦味非常濃郁，口感好厚身，龍蝦肉非常之多，飲落去唔會特別咸，非常開胃。蟹肉菠菜忌廉湯蟹肉意外地多，甚至有成條蟹腳肉。本身以為菠菜湯唔會好濃郁，味道偏鹹，但菠菜味都好出，意外地非常之夾！白酒忌廉煮藍青口藍青口作為appetizer黎講，份量好多，亦都冇淨低個殼嘅情況，白酒忌廉煮得好濃郁，朋友甚至仲當佢湯咁飲都得🤣上面三塊蒜蓉包整得好脆口，但又唔會油。
安格斯肉眼配紅酒燒汁肉眼扒比想像中大塊，都鎖到啲肉汁，大約係五成熟，牛扒本身嘅味道都好足，唔使點紅酒燒汁都ok。而佢旁邊嘅配菜一啲都唔馬虎，尤其係薯蓉同蘑菇等等，全部都好入味，蘑菇煎得啱啱好，夠香又唔會太乾身。
美國春雞配鵝肝燒汁美國春雞除咗雞髀位之外，全部都起晒骨！雞肉煮完之後唔會好鞋，夠哂嫩滑，調味料亦都唔會落得好重手。最欣賞係佢有熟嘅蒜頭，令到成個味道更加豐富。心太軟配雲呢拿雪糕心太軟比我想像中大好多，味道偏甜，但食落去唔會覺得好膩，雲呢拿雪糕香草味好香，而旁邊亦都有啲菠蘿同哈密瓜。