撈麵君 (Closed)

呢間位於砲台山宏輝大廈嘅新店 - 撈麵君，店面細細，但食物選擇都唔少，鋪頭仲有賣自家香辣菜脯、五仁醬丁，嗜辣嘅朋友絕對不容錯過。老壇酸菜湯雲吞 $33 湯底酸酸地好開胃，油份不多，味道唔會太辣，雲吞皮夠滑溜，一碗有成20粒，十分抵食。豬耳仔雜醬麵$39豬耳仔入味爽口，麵條富彈性，口感很好，撈埋秘製醬料惹味非常。豆腐丸子鍋 (細) $29配料包括豆腐串、牛丸、腸仔、魚蛋、蘿蔔、蓮藕，其醬汁麻辣有勁係整個鍋嘅精髓，豆腐串盡吸精華，整舊白蘿蔔入曬味，啖啖滋味，如果可以追加紅薯粉一定更加正。