潮發粥麵茶餐廳

Open Now

Now Closed

經過樂道，唔係咁肚餓入咗呢間叫潮發嘅麵店，睇咗一輪餐牌，見啲嘢食都唔平，一碗麵揀兩種餸要＄４０，最終叫咗一碗牛腩麵$３０，麵冇乜梘水味，牛腩入味，唔靭，仲有一、兩舊細細嘅牛根，亦係好夠淋，唔錯。食食吓之際周圍望吓牆上啲介紹，見到我嘅至愛酸菜，但要$20一碟，仲要惠顧任何粉麵至可以叫，心諗一碟配菜夠膽收人咁貴，就即管睇吓係咪真係咁巴閉。辣酸菜上枱，細細嘅一碟，有少少水浸住，唔會乾爭爭，似係有落過功夫，唔係就咁'畢"啲酸菜上碟就收人廿蚊。酸菜上面有啲蔥，入面混有辣椒段，有啲啲嘅蒜粒，有零零碎碎十數粒嘅肥豬肉碎。放入口嘞，WHAO！ 好食喎，啲酸菜口感爽脆，個味酸中帶甜（最怕一味得個酸字嘅酸菜），之後辣味開始刺激味蕾，再嚟就會食到啲蒜喺度整古做怪，整體食落有層次，「酸」搶唔到「甜」，「甜」又唔會中和哂啲「辣」，味道攞到個平衡，雖然食到尾聲已經辣到標哂汗，但絕對唔係食辣椒嗰隻死辣。只會愈食愈想食，好味，絕對會再食！推介俾所有鍾意食餐前酸菜呀、酸青瓜呀、泡菜呀、酸蘿蔔呀、西餐嘅pickle呀、炸菜呀、菜圃之類醃菜嘅人。但記得帶紙巾抺汗