大榮華圍村菜 (Closed)

又係一棚人嘅飯局，仲有大部份東九人或晌東九返工，順理成章就揀哩大榮華，除咗位置上就到大多數人，價錢亦係考慮因素，同枱友人想慳慳哋唔好食咁貴，大榮華確係經濟之選，打開點菜紙過百款圍頭小菜、點心、炒粉麵，樣樣都係賣$55，實在非常方便預數，兼且碟碟份量都有番咁上下，的確抵食！好似我哋8個人（2男6女），叫咗7餸，加埋個明火例湯同幾個豬油撈飯，都唔使6舊水，食到肚滿腸肥，哈哈！另外，餸菜水準都穩定，未必好到嘩嘩聲，但點都唔會話好差。圍頭五味雞 – 無考究個名嘅由來，睇樣似燒味嘅油雞，食落都似，雞肉OK，都夠入味。雞蛋焗魚腸 – 一上枱，一陣陣蛋香，個面又焗到脆脆，正！魚腸洗我乾凈，唔覺有苦！蝦醬豆卜蒸肉眼根 - 肉眼根咬落口幾爽，蝦醬蒸唔使講夠惹味，加埋索晒味嘅豆卜，撈飯至愛。蜆介薑蔥牛肉煲 - 蜆介，又係鹹香嘢，搭埋薑蔥，成個煲變得香噴噴，不過D牛肉一般般，有少少嚡添。鮑汁脆皮豆腐 – 個鮑汁唔算濃，但顯我個茨汁好油咁，唔知點解叫脆皮豆腐，咁煮法加埋個茨都變得唔脆啦！蒜茸炒豆苗 - 蒜茸炒乜都咁好食。鮑汁北菇扒波菜 - 鮑汁正如上面咁講，個味道都係薄身咗，但幸好波菜夠嫩，而D菇非常大隻夠厚