牛摩 (Closed)

由於喺農曆年初一睇到「牛摩」喺網上賣廣告宣傳話：「祇要係屬牛嘅牛仔牛女，喺年初一至年初七期間去他們每家分店惠顧都可以免費！」作為牛女嘅小妹一睇到，當然超級興奮啦！於是我就即刻打去其中一間分店查詢一下，店員話：「係呀！真係有呢個優惠呀！無論你有幾多個屬牛嘅人，祇要同佢一齊嚟嗰個朋友唔係屬牛，咁就可以喇！」咁即係等於買一送一嘅優惠！而且無得預訂位，要去現場攞票先可以！所以我們就揀咗喺農曆大年初六去青衣城分店食！一去到見到已有人客排隊等位，但比預期中少，所以等咗唔係好耐就可以入座！入座前，店員會喺門口叫屬牛嘅出示身分證，同埋問我們食邊款牛肉同湯底，佢話可以用到呢個優惠嘅有兩款牛肉，分別係美國精選牛肉同美國特級牛肉！我們就揀咗美國特級牛肉！至於湯底我們就揀咗昆布鰹魚清湯，因湯底嘅味道清甜，可以更加帶出所有食材嘅鮮味，唔會因為太過濃郁，而掩蓋晒食材原有嘅味道！首先嚟咗豬肉同鷄肉，賣相同質素同其他放題店差唔多，但牛肉就令我們有啲啲驚喜，因出嚟嘅份量都幾多幾大碟，而且切得都幾大件，所以食落口感好豐富，肉味相當香濃！至於自助區擺放嘅食物唔算係好新鮮，而且選擇唔太多，所以我們主要都係食牛肉！