大快活 (Closed)

係馬來西亞食得太多辣野，返到HK即刻喉嚨痛，所以唔可以亂食野，要食得簡單D清淡D。由於是日實在太累，無咩精神，唔想花時間諗食咩野，就決定黎大快活食個簡單午餐好了。大概兩點黎到都非常多人，大家都係度悠閒地睇下報紙食下野咁，好彩好快都搵到個卡位可以坐。叫左個迷你叉燒飯 + 北京水餃，另外媽咪一直推薦呢度既扒芝士火腿治，所以就叫左件，再加一碗雪菜肉絲米飯，仲有兩杯野飲，所以食物加埋$50都唔駛，都幾抵喎。呢度既服務好好，有求必應，而且好多野都好貼心，拎住碗湯米佢都俾個碟我盛住驚我倒瀉。先講扒芝士火腿治，真係幾好食，D芝士溶左大半，加埋脆脆夠薄既多士同無咩特別既火腿，絕對唔會難食。雪菜肉絲米都係無咩特別，湯底夠味夠濃，其他不值一提。迷你叉燒飯就真係差DD，D叉燒好薄同好乾身，無咩味~ D飯食落幾「鞋」口，汁亦唔夠，所以唔太好食。附加個幾隻水餃食落有D似灣仔碼頭，連個湯都係個隻味，不過相對呢度D水餃皮仲好厚D! 而且餡料較少，都係比較一般。雖然食物唔算好好食，但服務環境都算唔錯，而且我以前印象中既大快活係好鬼難食，今次都已經算OK架啦! 好似佢個吉列豚肉唔錯喎，等唔再喉嚨痛都想試下。=)