唐記包點

Open Now

Now Closed

今日放工入元朗搵朋友打麻雀，大家都唔想煮飯，於是乎去左呢間望落好新淨既唐記買野食。發現原來而家做緊嘅優惠超抵， $32蒸飯加點心，仲可以加兩蚊轉可樂。我同朋友就叫咗兩個套餐。兩個套餐我哋分別叫咗雞扎同埋燒賣。首先講下雞扎先，雞扎既腐皮夠薄，而且好足料，兩件大大件食完都有飽肚感。燒賣都好大粒，爽口彈牙冇粉感，同酒樓食既一樣味道！我叫左鳳爪排骨飯，排骨份量好夠，仲有兩隻鳳爪，性價比超高。排骨冇雪味，夠嫩滑。鳳爪好入味，比得上酒樓！最鍾意係個飯有配菜，感覺唔係淨係得肉同飯，健康d!我朋友就要左章魚肉餅飯，肉餅都幾厚身，食到一粒粒嘅章魚，同樣都係有啲配菜。飯粒粒粒分明，抵讚。鍋貼夠香口，拎咗返屋企雖然有少少遠咗但係都食到好香口嘅味道。最後一定要讚一讚呢支豆漿，平時飲嘅豆漿都好甜同埋有啲淡味，呢一支豆漿都幾重豆味，而且唔係好甜，啱晒女士啊。呢度加埋都係食咗$100多啲啲咋，超級抵食，如果唔想煮飯，依家都係唔錯嘅選擇喎。