迷客夏 (利園山道)

Open Now

Now Closed

十月已經過咗幾日喇,天氣開始清涼,但懶嘅人又未曾轉季,仍然衣衫單薄,行咗幾個鐘頭冷氣商場覺得好凍,又未夠鐘食飯,於是乎就拉阿肥嚟呢間<迷客夏>買杯熱飲暖暖胃。((話說銅鑼灣區嘅台式飲品店,本小姐只係淨番呢間人氣較高嘅未嘗試過)) 去到呢個moment,竟然呢間店舖嘅人龍仲長過隔離舖嘅欣子丹(?!)因為陣間仲要食飯,唔想因為飲完杯嘢已經飽咗,心裡面已經好肯定唔會叫珍珠奶茶嘅類別,所以都企咗喺度糾結咗一陣先決定到自己要一杯"出雲抹茶鮮奶",而阿肥就叫咗杯"柳丁綠茶"~個名果然係好台式叫法~ 收銀員妹妹都幾好禮貌,好親切咁介紹我唔好要正常嘅味道,因為都會幾偏甜下,所以我就要「一分糖」就算喇,阿肥亦都嗌咗微糖微冰。 買完單大約幾分鐘就出嘢飲,我嗰杯的確好熱,拎住都要小心啲靠邊拎比較穏陣,飲落味道真係啱啱好,幾有奶香不過唔算濃厚,抹茶都幾滑不覺苦澀,熱飲嘅份量都不失大杯,我都幾鍾意。阿肥話佢杯柳丁綠茶都唔錯,唔係用果gel而係鮮榨橙汁,冇乜冰嘅情況下所以味道唔會溝淡,茶味清香。