金滿堂甜品

Open Now

Now Closed

飯後兩口子喺附近行左一陣, 臨別秋波之際, 當然要食番個甜品作為送行, 記得喺晚飯時隔離有間甜品店, 於是就行過黎試一試喇!去到門口, 伙計話問坐出面定坐裡面, 當然師傅梗係唔坐裡面啦, 皆因又熱又落雨, 加上師傅又唔煲煙, 所以冇必要坐露天, 於是乎喺門口等一陣, 最後有位就可以入去坐喇!坐底後, 兩口子即刻商量下食好, 最後決定要個金枝玉葉同埋紅粉佳人!等左一陣兩個甜品就擺左喺面前, 金枝玉葉其實係楊枝金露改良版, 有芒果, 龍眼同埋西米露, 味道幾濃, d芒果漿就幾杰, 而芒果就甜酸參半, 龍眼就好清好甜, 而西米就幾特別, 皆因 脆卜卜, 幾好咬口, 唔會腍到爛咁, 幾好; 紅粉佳人就以士多啤梨為主打, 不過士多啤梨都幾酸, 但係個心形啫喱就好甜同幾煙韌, 加上西米露底夠清夠冰凍, 而西米又係脆卜卜, 好正呀!總括黎講甜品質素都唔錯, 環境一般, 服務尚可, 價錢可以接受! 食埋個送行甜品, 師傅就帶住一夥好滿足嘅心情離開, 應該會有一段時間唔會再黎呢區, 希望下次再黎印象同感覺依然會令人滿意啦, 今次笑臉絕對值得一比!