美味故事 (Closed)

朋友成日都話想去美味故事，我今日終於都陪佢嚟。餐廳環境寬敞仲有特色座位。店員會先奉上西瓜沙冰，refresh一下口腔。南瓜湯夠香夠滑，上面仲加咗一個笑臉， 十分窩心。香橙柚蜜煙鴨胸沙律夠晒清新，沙律菜亦好新鮮。煙三文魚他他多士屬於一口多士，一口一個可以將整件多士嘅味道一次過放入口品嚐。慢煮原隻去骨春雞嘅size以春雞來講非常巨型，而且佢用慢煮嘅方式去烹調，所以雞肉非常嫩滑。春雞嘅配菜就揀咗酸忌廉煙肉焗薯，酸忌廉配焗薯呢個配搭夠哂吸引。西京燒三文魚扒配香草忌廉汁份量亦好多，三文魚扒煎得出色，伴碟揀咗焗薯蔬，蔬菜顏色配搭得好靚，而焗薯就係小番薯。朋友鍾意白桃，所以揀咗白桃藍蝶花，好靚好打卡able，而我就比較注重養生，所以揀咗玫瑰養顏花果茶，兩款都各有特色。旺角呢個繁華鬧市中找到呢個寧靜角落，都係一個唔錯嘅選擇。